Fe allai bwydlen swper ar gyfer teithwyr dosbarth cyntaf ar fwrdd y Titanic werthu am hyd at £60,000 mewn arwerthiant fis nesaf.

Cafodd y swper, oedd yn  cynnwys wystrys, cig eidion, cig oen a hwyaden wyllt ei weini ar noson 11 Ebrill 1912, ar ôl i’r llong adael Queenstown (Cobh heddiw) yn Iwerddon am Efrog Newydd.

Bu farw mwy na 1,500 o deithwyr a chriw pan darodd y Titanic fynydd iâ ar 14 Ebrill cyn suddo’r diwrnod canlynol.

Mae'r fwydlen 6.25 modfedd x 4.25 modfedd yn cynnwys arwydd White Star Line coch a byddai wedi dangos llythrennau arian yn wreiddiol yn darlunio'r llythrennau blaen OSNC (Ocean Steamship Navigation Company) ochr yn ochr â'r llythrennau RMS Titanic.

Dywedodd yr arwerthwr Andrew Aldridge: “Mae’n dangos arwyddion o drochi mewn dŵr... ac mae cefn y fwydlen hefyd yn dangos tystiolaeth bellach o hyn yn glir.

“Byddai hyn yn tynnu sylw at y ffaith bod y fwydlen wedi bod yn nyfroedd rhewllyd Gogledd yr Iwerydd ar fore Ebrill y 15fed, naill ai ar ôl gadael y llong gyda goroeswr a oedd yn nyfroedd oer y môr neu ar un o’r rhai a gollwyd.

“Ar ôl siarad â phrif gasglwyr memorabilia’r Titanic yn fyd-eang ac ymgynghori â nifer o amgueddfeydd sydd â chasgliadau o’r Titanic, ni allwn ddod o hyd i unrhyw enghreifftiau eraill o fwydlen ginio Dosbarth Cyntaf o Ebrill 11 sydd wedi goroesi.

“Mae’r fwydlen yn ddarn rhyfeddol o’r llong enwocaf erioed.”

Ymhlith y teithwyr Dosbarth Cyntaf ar fwrdd y Titanic roedd y miliwnydd John Jacob Astor, y miliwnydd Benjamin Guggenheim, Syr Cosmo a’r Fonesig Duff Gordon.