Mae Prif Weinidog Israel Benjamin Netanyahu wedi gwrthod galwadau am gadoediad yn Gaza, gan ddweud y byddai hyn yn golygu "ildio i Hamas."

Wrth siarad yn Tel Aviv, dywedodd Mr Netanyahu fod y "Beibl yn dweud bod yna amser am heddwch ac amser am ryfel.

"Mae hwn yn amser ar gyfer rhyfel."

Ychwanegodd: "Mae hyn yn drobwynt i arweinwyr a chenhedloedd, mae'n amser i ni gyd benderfynu os ydyn ni'n barod i frwydro am ddyfodol o obaith ac addewid, neu ildio i ormes a braw.

"Bydd Israel yn brwydro."

Dywedodd hefyd bod angen gwahaniaethu rhwng "llofruddio pobl ddiniwed a'r rhai anfwriadol sy'n cyd-fynd â phob rhyfel cyfreithlon."

Yn y cyfamser, mae asiantaethau cymorth y Cenhedloedd Unedig wedi pwysleisio eu galwadau am gadoediad dyngarol mewn cyfarfod brys o'r Cyngor Diogelwch. 

Mae Unicef wedi dweud fod y sefyllfa yn Gaza yn gwaethygu fesul awr, ac mai "gwir gost y datblygiad diweddaraf hwn fydd bywydau plant."

Dywedodd byddin Israel eu bod wedi achub milwr yn Gaza a gafodd ei ddal yn wystl gan Hamas ar 7 Hydref. 

Mae Israel wedi bod yn bomio Gaza ers ymosodiadau Hamas ar 7 Hydref, sydd wedi lladd 1,400 o bobl gydag o leiaf 239 wedi eu cymryd fel gwystlon. 

Mae gweinyddiaeth iechyd Gaza, sy'n cael ei rhedeg gan Hamas, yn dweud bod mwy na 8,000 o bobl wedi cael eu lladd ers i Israel ddechrau eu bomio.