Mae Heddlu Sir Gaer wedi cyhoeddi eu bod yn cynnal ymchwiliad dynladdiad corfforaethol yn yr ysbyty lle roedd y llofrudd plant, Lucy Letby yn nyrs.

Cafodd Letby, 33, ei dedfrydu i garchar am oes ar ôl i reithgor ei chael yn euog o lofruddiaethau saith o fabanod ac o geisio llofruddio chwech arall yn uned newyddanedig Ysbyty Iarlles Caer yn 2015 a 2016.

Daeth cadarnhad gan y llu ddydd Mercher y bydd yr ymchwiliad yn canolbwyntio ar y cyfnod rhwng Mehefin 2015 a Mehefin 2016.

Dywedodd y Ditectif Prif Arolygydd Simon Blackwell: “Yn dilyn achos hirfaith, yr euogfarn yn erbyn Lucy Letby yn ddiweddarach ac asesiad gan uwch swyddogion ymchwilio, gallaf gadarnhau fod Cwnstabliaeth Sir Gaer yn dechrau ymchwiliad i ddynladdiad corfforaethol yn Ysbyty Iarlles Gaer.

“Bydd yr ymchwiliad yn canolbwyntio ar gyfnod y cyhuddiadau yn erbyn Lucy Letby, rhwng Mehefin 2015 a Mehefin 2016, ac fe fydd yn edrych ar agweddau fel uwch-arweinyddiaeth a’r penderfyniadau a wnaed, er mwyn penderfynu a oes unrhyw droseddau wedi eu cyflawni.

“Ar hyn o bryd, nid ydym yn ymchwilio i unrhyw unigolion mewn perthynas â dynladdiad drwy esgeulustod difrifol.

“Mae’n gynnar iawn yn yr ymchwiliad ac nid ydym yn gallu ehangu ar unrhyw fanylion neu ateb unrhyw gwestiynau penodol ar hyn o bryd.

“Rydym yn cydnabod y bydd yr ymchwiliad yn cael effaith sylweddol ar nifer o bobl, gan gynnwys y teuluoedd yn yr achos hwn, ac rydym yn parhau i weithio gyda nhw a'u cefnogi yn ystod y broses.”

Fis diwethaf, cyflwynodd Lucy Letby ei hapêl yn erbyn y dyfarniadau, ac mae disgwyl iddi wynebu achos llys arall y flwyddyn nesaf ar gyhuddiad o geisio llofruddio merch fach.