Bydd Pont Hafren yr M48 ar gau i gerbydau dros y penwythnos.

Bydd y bont yn cau'n gyfan gwbl am 06:00 fore dydd Sadwrn, 30 Medi, a bydd yn ailagor am 20:00 nos Sul, 1 Hydref, oherwydd gwaith cynnal a chadw.

Bydd traffig yn cael ei ddargyfeirio ar hyd pont yr M4 Tywysog Cymru a chynghorir y rhai sy'n teithio i ganiatáu amser ychwanegol ar gyfer teithiau tra bydd y gwaith yn cael ei wneud.

Bydd y rhai sy'n teithio yn ystod misoedd Hydref a Thachwedd yn wynebu dargyfeiriadau gan fod y bont hefyd ar fin cau bum gwaith yn ystod yr wythnosau nesaf.

Dywedodd Chris Pope, rheolwr cyflawni Priffyrdd Cenedlaethol: “Mae’n bwysig ein bod yn gwneud y gwaith ail-wynebu nawr i fynd i’r afael â nifer o ddarnau sy’n dirywio ar y ffordd gan y gallai’r tywydd oer a gaeafol gyflymu’r difrod ac arwain at atgyweiriadau brys heb eu cynllunio.

“Mae angen deunydd arwyneb arbenigol ar yr M48 ar Bont Hafren sy’n cymryd mwy o amser i’w ddefnyddio na’r hyn a ddefnyddir yn draddodiadol ar ffyrdd. Bydd angen cau nifer o weithiau ar benwythnosau felly i wneud y gwaith angenrheidiol.

“Rydym yn ddiolchgar i bobl am eu hamynedd tra bod y gwaith cynnal a chadw hanfodol hwn yn cael ei wneud.”