Mae'r erlyniad yn dadlau bod y canwr 27 oed wedi arddangos baner yn cefnogi Hezbollah mewn gig yn yr O2 Forum yn Kentish Town, gogledd Llundain, fis Tachwedd y llynedd.

Mae Hezbollah yn fudiad terfysgol sydd wedi ei wahardd ac mae datgan cefnogaeth iddo'n drosedd ynddi ei hun yn y DU.

Yn y gwrandawiad fis Medi, mae disgwyl i'r prif ynad Paul Goldspring ddyfarnu a oes modd i'r achos barhau.

'Newyddion drwg'

Ar gyfryngau cymdeithasol ddydd Llun, dywedodd y grŵp: “I'n holl ffans yn yr Unol Daleithiau, mae gennym newyddion drwg  

"Oherwydd fod ein gwrandawiad llys nesaf yn Llundain yn agos at ddyddiad ein taith.... bydd yn rhaid i ni ganslo ein 15 sioe fis Hydref yn America 

"Gyda phob tocyn wedi ei werthu ar gyfer pob sioe, i'n degau ar filoedd o ffans, rydym yn cyhoeddi newyddion trist. 

"Ond wedi i ni ennill ein hachos llys - ac fe wnawn ni - rydym yn addo trefnu taith fydd hyd yn oed yn fwy."

Yn ôl y band, mae modd i bawb gael ad-daliad, ac maen nhw wedi addo "rhannu newyddion arbennig iawn" gyda'u ffans yn America yr wythnos nesaf a fydd yn golygu y bydd modd "cysylltu â chi i gyd fis Hydref." 

Cadarnhaodd Kneecap y bydd eu sioeau yn Vancouver a Toronto, Canada fis Hydref yn cael eu cynnal. 

Cafodd y band, sef Liam Óg Ó hAnnaidh, Naoise O Caireallain a JJ O Dochartaigh, ei ffurfio yn ninas Belfast, gan ryddhau eu sengl gyntaf yn 2017.

Hawliodd y grŵp y penawdau fis Ebrill ar ôl i ddeunydd fideo ymddangos, lle roedd hi'n ymddangos fod aelod o'r band yn dweud "The only good Tory is a dead Tory...kill your local MP" ac "Up Hamas, up Hezbollah" mewn gig arall. 

Mae Kneecap wedi ymddiheuro i deuluoedd aelodau seneddol sydd wedi eu llofruddio, gan ddadlau hefyd "nad ydynt erioed wedi cefnogi" Hamas neu Hezbollah. 

Perfformiodd Kneecap yng Ngŵyl y Dyn Gwyrdd ym Mhowys ganol Awst. 

Ac yn gynharach eleni, fe gyhoeddodd y triawd eu bod yn ymestyn eu taith ar draws y DU gan berfformio yng Nghaerdydd fis Tachwedd.