Fe gafodd Cymru fuddugoliaeth o 28-8 yn erbyn Portiwgal yn Nice yng Nghwpan y Byd ddydd Sadwrn.

Fe sgoriodd Gymru bedwar o geisiau yn y gêm gan ennill un pwynt bonws, ond digon di-fflach oedd y perfformiad ar y cyfan.

Bu’n rhaid i Gymru, oedd mewn du, wneud newid cyn y gêm gyda’r blaenasgellwr Tommy Reffell yn tynnu nôl a Jac Morgan yn cymryd ei le.

Roedd yn achlysur mawr i’r mewnwr Tomos Williams wrth iddo ennill ei 50fed cap dros ei wlad.

Portiwgal gafodd y cyfle cyntaf i fynd ar y blaen ond fe wnaeth ymgais y mewnwr Samuel Marquéz  daro’r postyn ar ôl i ganolwr Cymru Johnny Williams gael ei ddal yn camsefyll.

Roedd y chwarae yn agored iawn yn y munudau cyntaf gyda Phortiwgal yn cael sawl cyfle i ymosod.

Fe ddaeth cais cyntaf i Gymru ar ôl wyth munud wrth i’r asgellwr Louis Rees-Zammit gasglu ei gic yn gelfydd i sgorio gyda’r cefnwr Leigh Halfpenny yn trosi o'r ystlys.

Fe gafodd Portiwgal ddigon o feddiant gyda’u holwyr yn dangos digon o fenter a doniau yn y chwarae agored i godi pryder ar Gymru.

Nid oedd popeth yn mynd o blaid Cymru ac fe dderbyniodd y canolwr Johnny Williams gerdyn melyn am drafod y bêl ar y llawr ar ôl 25 munud.

Gyda'r chwarae llac o fudd i Portiwgal roedd Cymru ar y droed ôl ar sawl achlysur.

Daeth pwyntiau haeddiannol cynta'r gêm i Bortiwgal o gic gosb gan y mewnwr Marquéz ar ôl i'r canolwr Mason Grady gael ei gosbi am dacl uchel. Cymru 7-3 Portiwgal.

Fe groesodd y capten a'r bachwr Dewi Lake y llinell gais yn eiliadau olaf yr hanner wrth i Bortiwgal gael eu cosbi yn gyson. Fe drosodd Halfpenny i wneud y sgôr yn Cymru 14-3 Portwigal.

Roedd Cymru yn fwy balch na Phortiwgal i glywed y chwiban am yr egwyl yn dilyn hanner cyntaf heb fawr o strwythur i'w chwarae.

Chwarae blêr

Nid oedd munudau cyntaf yr ail hanner lawer yn well wrth i Gymru golli tair lein a chwarae blêr yn ildio rhagor o feddiant i Bortiwgal.

Fe ddaeth trydydd cais Cymru ar ôl 55 munud gan Jac Morgan yn hyrddio drosodd a gyda Halfpenny yn ychwanegu'r trosiad roedd mantais Cymru wedi ymestyn i 21-3.

Fe ddaeth bloedd ucha’r prynhawn ar ôl 62 munud pan groesodd Portiwgal am gais haeddiannol o lein gyda’r blaenasgellwr Nicola Martins yn twyllo blaenwyr Cymru.

Cymru 21-8 Portiwgal.

Fe groesodd yr eilydd Gareth Davies am gais i Gymru ar ôl 74 munud ac er i Sam Costelow drosi fe ddiddymwyd y cais am rwystro yn gynharach yn y symudiad.

Yna fe aeth Portiwgal i lawr i 14 dyn pan gafodd yr asgellwr Vincente Pinto gerdyn melyn am chwarae peryglus.

Fe groesodd Taulupe Faletau am bedwerydd cais i Gymru a phwynt bonws gyda Costelow yn trosi yn eilad olaf o'r chwarae.

Yn sicr fe fydd yn rhaid i Gymru godi eu gêm yn erbyn Awstralia y penwythnos nesaf.

Y sgôr terfynol: Cymru 28-8 Portiwgal.