Mae swyddogion Heddlu Trafnidiaeth Prydeinig wedi rhyddhau lluniau cylch cyfyng o ddyn wrth ymchwilio i ymosodiad rhyw honedig yng Nghaerfyrddin.

Yn ôl y llu fe wnaeth dyn ymosod yn rhywiol ar fenyw yng ngorsaf y dref ar ddydd Iau 13 Gorffennaf.

Roedd y fenyw yn aros am drên i orsaf Doc Penfro am 14:50 pan ddechreuodd y dyn siarad gyda hi cyn ymosod arni'n rhywiol.

Ychwanegodd y llu bod y dyn wedi dilyn y fenyw ar y trên ac eistedd wrth ei hymyl gan ei hatal rhag symud.

Fe wnaeth y dyn barhau i siarad gyda hi cyn ymosod yn rhywiol arni eto.

Fe adawodd y dyn y trên yn Ninbych-y-pysgod tua 15:30.

Mae swyddogion eisiau siarad gyda'r dyn yn y lluniau cylch cyfyng mewn cysylltiad gyda'u hymchwiliad.

Mae'r llu yn galw ar unrhyw un sydd â gwybodaeth i gysylltu gyda'r heddlu trwy anfon neges destun i 61016 neu galw rhif 0800 40 50 40 gan ddyfynnu'r cyferinod 2300081083.  

Llun: Heddlu Trafnidiaeth Prydeinig