"Josh fi ydi o...dwi isio fo cysgu'n dawel ac o'n i'n gobeithio byswn i wedi cael atebion cyn gorfod claddu fo."

Mae mam dyn ifanc fu farw mewn gwrthdrawiad ger Caernarfon yn gynharach eleni yn dweud bod y teulu angen atebion am yr hyn ddigwyddodd.

Bu farw Joshua Lloyd Roberts, 19 oed, mewn gwrthdrawiad yng Nghaeathro ar 2 Mehefin eleni.

Roedd yn wreiddiol o Gaernarfon, ac yn fyfyriwr ym Mhrifysgol Metropolitan Caerdydd. 

Mewn cyfweliad gyda BBC Cymru, dywedodd ei fam Melanie Tookey: "'Dan ni ddim yn medru prosesu pethau. 'Dan ni dal methu coelio'r peth achos does genna ni ddim byd i ddeud 'hyn sydd wedi digwydd' neu beth bynnag. 'Dan ni ddim yn gwybod.

"Mae o jyst yn horrible bod yn y sefyllfa yma."

Mae dyn 32 oed wedi cael ei arestio ar amheuaeth o achosi marwolaeth Joshua Lloyd Roberts drwy yrru'n ddiofal.

Mae'r dyn bellach wedi cael ei ryddhau ar fechnïaeth wrth i'r ymchwiliad barhau. 

'Disgwyl a disgwyl'

Byddai Josh wedi dychwelyd i'r brifysgol yng Nghaerdydd yr wythnos hon.

"Fysa Josh i fod i fynd yn ôl i brifysgol wythnos yma so mae'r cyfnod oedd o fod adra, y pymtheg wythnos 'dio ddim 'di bod yma," meddai Melanie.

"Mewn ffordd 'dan ni weithiau jyst yn meddwl bod o jyst yng Nghaerdydd ond wedyn 'dan ni'n atgoffa'n hunain, na dydi o'm yma, ond weithiau neith hynna helpu ni jyst mynd â ni trwy'r disgwyl 'ma."

Ychwanegodd: "Dwi mor falch o Josh. Fyswn i ddim di medru gofyn am fab gwell ac o'n i yn deutha fo yn aml fod fi'n falch ohono fo a dwi'n hapus bo' fi 'di gwneud hynny.

"'Dan ni jyst isio fo fod drosodd i ni gael symud ymlaen yn lle bod ni jyst yn disgwyl a disgwyl a disgwyl."

Dywedodd Heddlu Gogledd Cymru wrth BBC Cymru: “Rydym yn parhau i ymchwilio i farwolaeth drasig Joshua Roberts ac mae'r teulu'n cael y wybodaeth ddiweddaraf gan swyddogion cyswllt teulu.”