Mae’r dynwaredwr a’r digrifwr Mike Yarwood wedi marw yn 82 oed.

Fe ddaeth i enwogrwydd mewn rhaglenni teledu yn y 1970au ar y BBC.

Roedd ei raglenni yn denu cynulleidfaoedd o 20 miliwn yn gyson.

Dywedodd yr elusen The Royal Variety ei fod "yn gadael bwlch anfesuradwy yn y diwydiant adloniant ar ei ôl.

"Fe ddaeth ei dalent i ddynwared pobl â gwenau i wynebau miliynau o bobl."

'Chwerthin'

Roedd yn enwog am ddynwared y cyn prif weinidogion Harold Wilson a Ted Heath yn ogystal â Thywysog Charles ar y pryd.

Dywedodd y personoliaeth teledu a chyn golygydd papur newyddion Piers Morgan ar y cyfryngau cymdeithasol: “Roedd yn seren enfawr pan o’n i’n tyfu i fyny ac roedd yn ddynwaredwr a digrifwr dawnus.

"Cwsg mewn hedd Mike a diolch am y chwerthin.”