Mae'r heddlu wedi enwi dyn fu farw ar ôl i gar fynd i mewn i'r dŵr ym Marina Abertawe fore Mercher.

Bu farw Andrew Harding, 52 oed, o Abertawe yn dilyn y digwyddiad.

Cafodd Heddlu De Cymru eu galw i’r safle toc wedi 10.00 fore Mercher yn dilyn adroddiadau bod cerbyd wedi mynd i’r dŵr ger Amgueddfa Genedlaethol y Glannau. 

Dywedodd y Ditectif Arolygydd Chris Evans “Mae ei berthnasau agosaf wedi cael gwybod ac yn cael eu cefnogi gan swyddogion  arbenigol.

“Mae CCTV yn dangos bod y car, Audi du, yn teithio ar  gyflymder pan aeth dros rwystr ac i mewn i ardal wedi ei bedestraniddio, cyn mynd trwy reiliau ac i mewn i'r marina.

“Mae’r farwolaeth yn cael ei thrin fel un anesboniadwy ar hyn o bryd ac mae ymholiadau’n parhau i ganfod yr amgylchiadau llawn y tu ôl i’r digwyddiad.”

Yn ôl yr heddlu, mae disgwyl i archwiliad post-mortem gael ei gynnal ddydd Gwener 1 Medi, i ddarganfod achos y farwolaeth.

Llun: John Davies/Creative Commons.