Mae dyn 27 oed wedi marw yn dilyn gwrthdrawiad ar briffordd rhwng Coldra yng Nghasnewydd a Brynbuga yn Sir Fynwy ddydd Sul. 

Cafodd Heddlu Gwent eu galw i ffordd yr A449 oddeutu 13.30 brynhawn Sul. 

Roedd y gwrthdrawiad rhwng dau gerbyd, sef fan a cherbyd amaethyddol. Bu farw gyrrwr y fan ar ôl iddo gael ei gludo i’r ysbyty. 

Mae teulu'r dyn wedi cael gwybod am ei farwolaeth ac yn cael eu cefnogi gan swyddogion arbenigol.

Fe gafodd y ffordd ei chau i’r ddau gyfeiriad am ryw 8 awr  ddydd Sul. 

Mae'r heddlu yn apelio ar unrhywun a oedd ar ffordd yr A449 rhwng 13.00 a 14.00 brynhawn Sul i gysylltu â nhw.