‘Ein bachgen hyfryd’: Teyrngedau i Morgan Ridler fu farw o ganser prin
28/06/2023
Mae teulu bachgen tair oed fu farw ar ôl diagnosis o ganser prin wedi rhoi teyrnged iddo.
Cafodd Morgan Ridler o Abertawe ddiagnosis o ganser cortecs y chwarren adrenal yn ddwy oed, a roedd yn derbyn gofal lliniarol yn Hosbis Tŷ Hafan.
Fe wnaeth ei deulu sefydlu elusen o’r enw Morgan’s Army Charitable Foundation, er mwyn rhoi cefnogaeth i deuluoedd plant yn ne Cymru sydd â chanser.
Daeth cadarnhad ar dudalen yr elusen fore Mercher am farwolaeth Morgan.
Mewn teyrnged ar Facebook, dywedodd ei deulu: “Fe gychwynnodd ein bachgen hyfryd ar ei antur fawr nesaf am 05.30 bore ‘ma. Roedd o’n heddychlon ac yn gyfforddus gyda’i deulu o’i gwmpas.
“Er y digwyddodd yn gyflymach na fyddwn ni fyth wedi gallu disgwyl, roedd Morgan mewn rheolaeth ar y diwedd un, yn gwybod ei fod yn ddiogel ac ein bod ni yna gyda fe.
“Dim mwy o boen rhagor, fe wnes di frwydro mor hir. Roeddet ti wastad yn gwenu, wastad yn chwerthin a wastad yn caru.
“Er fy mod i’n dymuno na fyddai hyn erioed wedi digwydd i ni, dw i’n gwybod ein bod ni yn bobl well am gael dy 'nabod a dy garu di. Ti wedi dysgu ni sut i garu fwy.
“Mi wyt ti wedi ysbrydoli mwy o gariad ynddon ni nag oeddwn i erioed yn teimlo’n bosib, mi wyt ti wedi cael dylanwad mor dda ac mi rydym yn ddiolchgar iawn ohonot ti.
“Ein Morgs. Ein Squishy.”
Swansea City is deeply saddened to learn of the passing of Morgan Ridler. We were so privileged to have Morgan lead our side out against Cardiff. The courage you and your family have shown has been an inspiration to us all ❤️
— Swansea City AFC (@SwansOfficial) June 28, 2023
Rest in peace, Morgan. Once a Jack, always a Jack. pic.twitter.com/40zuV0SxGi
Mae Undeb Rygbi Cymru, Clwb Pêl-droed Dinas Abertawe a rhanbarth rygbi’r Gweilch i gyd wedi rhoi teyrngedau i Morgan yn ogystal.
Dywedodd neges ar gyfryngau cymdeithasol gan CPD Abertawe: “Mae CPD Dinas Abertawe wedi tristáu o glywed am farwolaeth Morgan Ridler.
Cawsom y fraint o gael Morgan yn arwain ein tîm yn y gêm yn erbyn Caerdydd. Mae’r dewrder rwyt ti a dy deulu wedi dangos yn ysbrydoliaeth i ni gyd.
“Cwsg mewn hedd, Morgan.”
❤️ Nos Da Morgan
— Welsh Rugby Union 🏴 (@WelshRugbyUnion) June 28, 2023
Our sincerest condolences go to Morgan’s family and loved ones 🎗️#MorgsArmy pic.twitter.com/SsRaC0sVwq
