Mae cyfieithiad o'r nofel Llyfr Glas Nebo gan Manon Steffan Ros wedi ennill Medal Yoto Carnegie eleni. 

'The Blue Book of Nebo' yw'r cyfieithiad cyntaf i ennill y wobr erioed.

Wedi ei sefydlu bron 90 o flynyddoedd yn ôl, Yoto Carnegie yw'r gwobrau hynaf ym myd llyfrau plant a phobl ifanc yn y DU, ac maent yn dathlu llwyddiant ym maes ysgrifennu a darlunio. 

Dywedodd Manon Steffan Ros wrth Newyddion S4C bod y wobr yn "golygu cymaint" iddi.

"O ni’n arfer gweld enw’r wobr ar gloriau fy hoff lyfrau pan o ni’n ifanc, felly ma meddwl am Llyfr Glas Nebo, bod o’n un o’r llyfrau yna rwan - dwi just wrth fy modd.

"A dyma di’r cyfieithiad cyntaf i ennill y wobr, ma hwnna wir yn fy nghyffwrdd i", meddai. 

Codi ymwybyddiaeth o'r Gymraeg

Ychwanegodd yr awdures: "Mae o mor mor anrhydeddus achos ma' darllen cyfiethiadau yn bwysig. Yn enwedig, dwi’m meddwl o fewn y byd Saesneg ei iaith dydy pobl ddim yn tueddu darllen cyfieithiadau.

"Mae’n rhoi persbectif reit wahanol i chi. A hefyd yn codi ymwybyddiaeth o’r iaith Gymraeg gobeithio".

Mae'r gyfrol Gymraeg wrieddiol eisoes wedi ennill sawl gwobr, gan gynnwys y Fedal Ryddiaeth yn Eisteddfod yr Urdd yn 2018 a Llyfr y Flwyddyn yn 2019. 

Ysgrifennodd yr awdures y llyfr i bobl ifanc. 

"Dyna oedd y bwriad, dyna ydy nghariad cynta i" meddai.

Mae'r nofel wedi'i gosod ym mhentref Nebo yng Ngwynedd mewn cyfnod ôl-apocalyptaidd.

Mwynhau cyfieithu

Ychwanegodd Manon Steffan Ros: "Nes i gyfieithu Llyfr Glas Nebo achos dwi’n mwynhau cyfieithu yn greadigol. A pan nes i ddechrau o ni wir ddim yn disgwyl sa hi’n cael ei chyhoeddi.

"O ni’m yn gwybod os fasa rhywun hefo diddordeb i’w chyhoeddi hi yn Saesneg. Felly yr unig reswm o ni isio neud o oedd i’m mhleser fy hun i ddweud y gwir.

"Mae’r sylw ma a’r ffaith bod pobl yn mwynhau, ma hwnna’n syndod i mi. Mae’n beth ofnadwy, ofnadwy o braf."

Yn ôl yr awdures, mae cyfieithu nofelau i'r Saesneg yn gallu bod yn fuddiol i'r iaith Gymraeg er nad oes "traddodiad bywiog iawn o gyfieithu.

"Da ni mor lwcus ma gennon ni ddiwylliant cyhoeddi mor ddifyr a gwych a dwi’m yn meddwl bod pobl tu allan i Gymru yn gwybod hwnna."

Yn y feirniadaeth, cafodd y nofel ei disgrifio fel un “dorcalonnus”,  gyda “chyfoethog o dreftadaeth Gymreig.”