Mae rhai stondinwyr ym marchnad Caerdydd yn poeni am effaith posib cynlluniau'r cyngor i adnewyddu’r adeilad hanesyddol.

Fel rhan o'r datblygiad, fe fydd yna ardal fwyta gyda lle i 70 o seddi - ac mae nifer o fusnesau yn poeni y gallai hynny fod yn ergyd ariannol.

Maen nhw hefyd yn ofni y gallai amharu ar “hanes a chymeriad” y farchnad.

Yn ôl llefarydd ar ran y cyngor, y nod yw “denu mwy o ymwelwyr newydd” ond gan sicrhau eu bod yn “gofalu am elfennau gwreiddiol” sy’n perthyn i’r lle.

Mae Ieuan Harry o gwmnu Ffwrnes Pizza yn croesawu’r penderfyniad tra hefyd yn rhybuddio nad oes angen gweddnewidiad llwyr.

“Yn y bôn mae’r cynlluniau yn edrych yn ffab," meddai.

Image

“Ond os dyw e heb dorri, sydd ddim isio trwsio fe. Ma' 'na reswm bod yr farchnad yn llwyddiannus, a hwnna yw ma'n gweithio fel ma' fe.

“Beth i ni di gweld o'r cynlluniau bod nhw'n treial cadw cymeriad a golwg sylfaenol y marchnad sy'n beth pwysig.

“Peth pwysig am y marchnad 'ma yw'r cymysgedd o bobl sy' 'ma. Ma' 'da ni cymysgedd o stondinau traddodiadol, yr hen stondinau a wedyn y stondinau bwyd newydd yn cynnwys ni fel un o nhw.

“A ma'n bwysig bo ni'n cadw'r cymeriad 'na yn y marchnad achos mae'n cynhyrchiad perffaith o holl bobl Caerdydd.”

Yn 'dda i'r farchnad'

Agorwyd y farchnad yn 1891 ac mae 2.2 miliwn o bobl yn pasio drwyddi bob blwyddyn.

Ar gost o filiynau o bunnau, meddai'r cyngor, fe fydd yr adeilad cofrestredig gradd II yn gartref i 61 o fusnesau.

Fe fydd na waith adnewyddu i’r to sy’n gollwng dŵr, gan osod paneli solar arno ynghyd â datgelu’r lloriau gwreiddiol sydd ar lawr y farchnad.

“Mae nhw’n trial rhoi lle i’r bwyd llawer yn fwy na beth ydyn nhw i stondinau sydd wedi bod yma yn hir ac sy’n hynod brysur ac sy’n denu pobl i’r farchnad, sydd yn llawer mwy prysur ac sy’n creu gwasanaeth i bobl,” meddai Jules Yates, perchennog stondin On Time.

“Felly maen nhw’n dangos bias i’r bwyd”

Mae cwmni'r cigydd Alan Griffiths wedi bod yn y farchnad ers 54 mlynedd.

“Maen nhw'n edrych yn dda iawn ar y lluniau. Os ydyn nhw'n dod oddi arnyn nhw, byddan nhw'n dda iawn a bydd yn dda i'r farchnad.

"Yr hyn nad ydym wir eisiau ei wneud gormod yw ei wneud yn llwyr i gwrt bwyd ac nid marchnad lle mae llawer o wahanol fathau o grefftau."

Fe gafodd Marchnad Casnewydd ei hadnewyddu ym mis Mawrth 2022 gyda phwyslais ar stondinau bwyd.

Mae Lowri Haf Cooke, awdur a cholofnydd bwyd, yn rhybuddio yn erbyn dilyn yr un patrwm a’r farchnad honno.

“Dwi’n llawn chwilfrydedd, a dwi’n llawn amheuon hefyd. Hynny ydy bo nhw ddim yn creu gormod o le i’r hipsters a’u harian mawr a bo nhw’n prisio pobl gyffredin allan o’r farchnad.

“Da ni ddim isho be sy di digwydd ym Marchnad Casnewydd ble mae pobl leol ddim yn teimlo nid dyna’r lle iddyn nhw.”