Mae cerflunydd wedi dylunio draig goch enfawr yn Sioe Flodau Chelsea mewn teyrnged i'r Brenin ar ôl iddo gael ei goroni. 

Fe wnaeth James Doran-Webb, sydd yn wreiddiol o Ddyfnaint, ond bellach yn byw yn Cebu yn Y Philipinau, adeiladu draig goch saith-metr o uchder mewn teyrnged i Goroni'r Brenin. 

Cafodd Mr Doran-Webb ei ysbrydoli gan fyd natur, ac mae ei waith diweddaraf, sef cerflun o ddraig yn pwyso ar goeden, yn pwyso chwe thunnell. 

Dywedodd: "Ers i mi ddarganfod y goeden farw yn 2011, ac ar ôl cael caniatâd i'w chludo i fy ngweithdy, mae wedi bod yn brofiad anhygoel i adeiladu'r ddraig ac atgyfodi'r goeden fel y gallai'r cerflun bwyso arni.

"Mae dychwelyd i Sioe Flodau Chelsea wastad yn uchafbwynt ac mae'n gyffrous i weld fod pobl eraill yn cael gweld y ddraig hefyd."

Fe wnaeth Mr Doran-Webb greu ac adeiladu'r cerflun yn Y Philipinau cyn ei fod yn cael ei gludo drosodd i'r DU 45 diwrnod yn ddiweddarach ar gwch er mwyn ei arddangos yn Sioe Flodau Chelsea. 

Bydd y cerflun yn cael ei arddangos yn y sioe rhwng 22 a 27 Mai.