Bu bron i'r Tywysog Harry a’i wraig Meghan gael damwain "drychinebus" wrth gael eu herlid gan aelodau o'r paparazzi, yn ôl llefarydd ar eu rhan.

Honodd y llefarydd i gar y cwpwl gael ei ddilyn gan paparazzi yn Efrog Newydd nos Fawrth wedi iddyn nhw fod mewn seremoni wobrwyo.

Roedd mam Meghan hefyd yn y car ar y pryd, meddai.

Dywedodd y llefarydd: “Fe gafon nhw eu dilyn yn ddi-baid am dros ddwy awr.

"Fe wnaeth hyn bron iawn ag achosi sawl gwrthdrawiad, gan gynnwys gyda gyrwyr eraill, cerddwyr a dau swyddog o Heddlu Efrog Newydd.

“Er bod bod yn ffigwr cyhoeddus yn dod â lefel o ddiddordeb gan y cyhoedd, ni ddylai byth ddod ar draul diogelwch unrhyw un.

“Mae lledaenu’r delweddau hyn, o ystyried y ffyrdd y cawsant eu casglu, yn annog arfer ymwthiol iawn sy’n beryglus i bawb dan sylw.”

Does dim cadarnhad wedi dod gan Heddlu Efrog Newydd am y digwyddiad hyd yma.