Dylai'r diwydiant chwaraeon roi'r gorau i'w cytundebau nawdd gyda chwmniau sydd yn llygru'r amgylchedd, yn ôl ymgyrchwyr.   

Mae enillydd medal aur yn y Gemau Olympaidd, ym maes canŵio, Etienne Stott ymhlith yr ymgyrchwyr sy'n credu na ddylai cwmniau ceir fel Toyota a BMW gael yr hawl i noddi cystadlaethau chwaraeon. 

Mae'r ymgyrchwyr yn cymharu'r trefniant ag ymgyrchoedd tybaco yn y gorffennol. 

Yn ôl ymchwilwyr, mae cwmniau ceir fel Toyota a BMW yn gwario £3.6 biliwn ar gytundebau nawdd ym myd chwaraeon, er mwyn "gwella eu delwedd ym maes cynaladwyedd, er eu bod nhw'n rhoi pwysau ar lywodraethau i oedi gyda pholisïau amgylcheddol"  

Mae'r adroddiad gan sefydliad y New Weather Institute ac ymgyrch Badvertising a gafodd ei gyhoeddi ddydd Mercher yn cyfeirio at gytundebau noddi rhwng BMW a Chlwb Pêl-droed Real Madrid, a chyswllt Toyota â ras feicio'r Giro d’Italia.

Yn ôl yr ymchwilwyr, gwerthodd y ddau gwmni fwy na gwerth 12.5 miliwn injan hylosgi ar gyfer ceir yn 2021. Mae hynny yn gyfystyr â rhyddhau 855 miliwn o dunnelli o  C02, yn ôl yr ymgyrchwyr, sef yr hyn sy'n cyfateb i  230 o bwerdai glo yn rhedeg am flwyddyn gyfan. 

Mae Toyota yn parhau i fuddsoddi mewn cerbydau sydd ag injan hylosgi o'r fath, gyda chynlluniau i werthu 110 miliwn ohonyn nhw, medd yr ymchwilwyr. 

Mae'r adroddiad hefyd yn honni fod Toyota a BMW wedi brwydro yn erbyn polisïau amgylcheddol, a rheolau llymach i atal newid hinsawdd, er eu bod yn "hawlio eu bod yn arwain ym maes cynaladwyedd."  

Dywedodd llefarydd ar ran BMW: “Mae cynaladwyedd yn rhan sylfaenol o strategaeth gorfforaethol BMW." 

“ Erbyn 2030, bydd o leiaf 50% o werthiant byd eang BMW yn ymwneud â cherbydau trydan."

Mae Toyota wedi cael cais i ymateb.