Mae rheolwr CPD Dinas Caerdydd Sabri Lamouchi wedi gadael yr Adar Gleision ar ôl i’r clwb benderfynu peidio ag ymestyn ei gytundeb.

Fe gafodd y Ffrancwr ei benodi’n rheolwr ym mis Ionawr gyda’r clwb yn yr 21ain safle yn y Bencampwriaeth.

Fe wnaeth yr Adar Gleision ennill chwe gêm allan o 18 o dan ei arweiniad, wrth i’r tîm lwyddo i osgoi’r cwymp i Adran Un gan orffen y tymor yn yr 21ain safle.

Ond daeth cadarnhad gan y clwb ddydd Mawrth y bydd cyn reolwr Arfordir Ifori a Nottingham Forest yn gadael ar ddiwedd ei gytundeb presennol.

Mi fydd y clwb nawr yn edrych am eu pedwerydd rheolwr mewn 12 mis, wedi i Steve Morison a Mark Hudson ymddiswyddo yn gynharach yn y tymor.

#CardiffCity can confirm that Sabri Lamouchi will depart at the conclusion of his current deal.

We would like to thank Sabri for his contribution and wish him all the very best.

The Board of Directors have already begun the process of appointing a new management team.

— Cardiff City FC (@CardiffCityFC) May 16, 2023

Mewn datganiad, dywedodd llefarydd ar ran y clwb:

“Hoffai Clwb Pêl-droed Caerdydd ddiolch i Sabri am ei ymdrechion a’i gyfraniad i’n helpu i sicrhau ein lle yn y Bencampwriaeth ar gyfer y tymor 2023/24 a dymuno’r gorau iddo i’r dyfodol.

“Mae Bwrdd Cyfarwyddwyr Clwb Pêl-droed Dinas Caerdydd eisoes wedi dechrau ar y broses o benodi tîm rheoli newydd.”