Mae cynlluniau "cyffrous iawn" ar gyfer ysgol gynradd Gymraeg newydd yng Ngheredigion wedi cael eu cymeradwyo gan gynghorwyr.

Bydd Ysgol Dyffryn Aeron yn cael ei hadeiladu ar safle ger Felin-fach rhwng Aberaeron a Llambed.

Pleidleisiodd Pwyllgor Rheoli Datblygu'r sir ar y mater ddydd Mercher.

Fe fydd lle ar gyfer 240 o ddisgyblion a 56 o staff dysgu yn yr ysgol £11m a fydd yn cael ei hadeiladu gan Wynne Construction.

Y bwriad yw bod ysgolion Ciliau Parc, Felin-fach a Dihewyd yn cau er mwyn ffurfio’r ysgol newydd.

Yn y cyfarfod dywedodd cynghorydd Llanfihangel Ystrad, Ceris Jones, ei fod yn “ddatblygiad cyffrous iawn i’r ardal”.

“Rwy’n gwybod nad yw pawb yn hapus fod tair ysgol yn cau,” meddai.

'Di-garbon'

Dywedodd cynghorydd Ciliau Aeron Marc Davies y dylid cefnogi’r cais.

“Mae pawb yn gyffrous iawn am y datblygiad hwn - mae addysg yng Ngheredigion ymhlith y gorau yng Nghymru,” meddai.

Dywedodd yr asiant TACP Architects Ltd, mewn datganiad i’r cyngor y bydd y datblygiad “yn dod â safon yr ystafelloedd addysgu sydd ar gael yn Nyffryn Aeron i fyny i safonau ysgolion yr 21ain Ganrif”.

“Bydd hefyd yn darparu ysgol ddi-garbon net, gan gyfrannu at ymdrechion Cyngor Ceredigion i ddarparu awdurdod di-garbon erbyn 2030,” medden nhw.

“Bydd y datblygiad hwn hefyd yn ceisio cryfhau cysylltiadau â’r gymuned leol drwy ymgorffori cyfleusterau sydd o fudd i’r ysgol a’r gymuned.”