Mae beiciwr modur wedi dioddef anafiadau difrifol yn dilyn gwrthdrawiad yn Nolwyddelan, Sir Conwy ddydd Mawrth.

Cafodd yr heddlu eu galw toc wedi 14:00 yn dilyn adroddiadau am wrthdrawiad rhwng beic modur a char Ford Fiesta du ar ffordd yr A470 ger Castell Dolwyddelan.

Aeth y gwasanaethau brys, gan gynnwys ambiwlans awyr i gynorthwyo yn y digwyddiad.

Cafodd y beiciwr modur ei gludo i ysbyty yn Stoke gan yr ambiwlans awyr ac mae ei anafiadau wedi eu disgrifio fel rhai all newid ei fywyd.

Ni chafodd gyrrwr y Ford Fiesta unrhyw anafiadau.

Dywedodd Sarjant Jason Diamond o Uned Blismona'r Ffyrdd Heddlu'r Gogledd eu bod yn apelio am wybodaeth gan unrhyw un oedd wedi gweld y gwrthdrawiad neu oedd yn teithio ar yr A470, a gyda delweddau dashcam i gysylltu gyda'r llu.

"Rwyf hefyd yn apelio ar i unrhyw un oedd wedi gweld dau feic modur yn cael eu gyrru gan yrwyr gyda helmedau du a lifrau gyrru lledr du, oedd yn teithio rhwng Betws-y-coed a Dolwyddelan i gysylltu gyda ni."

Mae'r ffordd bellach wedi ailagor i'r ddau gyfeiriad.