Mae'r Gweinidog Addysg, Jeremy Miles, wedi dweud na ddylai logos ar wisgoedd ysgol fod yn orfodol wrth gyhoeddi canllawiau newydd heddiw.

Dywedodd Jeremy Miles bod gwisg ysgol "yn rhan bwysig o greu ymdeimlad o hunaniaeth ar gyfer ysgol" ond ei fod yn "hanfodol bod y wisg yn fforddiadwy".

Galwodd ar ysgolion i ostwng costau gwisgoedd ysgol er mwy lleddfu'r baich ar gyfer teuluoedd "sy'n parhau i deimlo pwysau’r cynnydd mewn costau".

Fe ddaw sylwadau Mr Miles yn dilyn ymgynghoriad cyhoeddus ar ganllawiau gwisg ysgol, a wnaeth ofyn pa mor fforddiadwy oedd gwisgoedd ysgol yn ystod yr argyfwng costau byw.

"Rydym yn gwybod bod gwisgoedd ysgol wedi’u brandio yn gallu bod yn llawer drutach i deuluoedd," meddai Jermey Miles.

"Dyna pam na ddylai ysgolion eu gwneud yn orfodol. Yn sicr, ni ddylai fod gofyniad i nifer o eitemau fod wedi’u brandio.

"Yng Nghymru rydym yn gwneud popeth o fewn ein gallu i gefnogi teuluoedd, gyda llawer o deuluoedd incwm is yn gymwys ar gyfer y Grant Hanfodion Ysgol. Dyma'r cynllun mwyaf hael o'i fath yn y DU, sy’n darparu hyd at £300 i deuluoedd i brynu gwisg ysgol ac offer."

'Adolygu'

Cafodd rhieni, gofalwyr, dysgwyr, cyrff llywodraethu, penaethiaid, athrawon a staff ysgol, cyflenwyr gwisgoedd ac eraill eu gwahodd i rannu eu barn fel rhan o'r ymgynghoriad.

Roedd 56% yn dweud na ddylai logos ymddangos ar wisgoedd ysgol o'i gymharu â 27% a oedd yn anghytuno.

“Rwy’n galw ar gyrff llywodraethu ysgolion i adolygu eu polisïau gwisg ysgol presennol i sicrhau bod fforddiadwyedd yn cael ei flaenoriaethu," meddai Jeremy Miles.

"Dylai unrhyw newidiadau i bolisi gwisg ysgol gael eu cyfathrebu i deuluoedd cyn diwedd y tymor ysgol presennol."

Mae canllawiau newydd hefyd yn galw am roi trefniadau yn eu lle fel bod gwisgoedd ysgol ail law ar gael ar gyfer rhieni a gofalwyr.

Mae rhieni a gofalwyr i blant yr ysgol wedi ymateb yn bositif i’r cais i roi gwisg ysgol sy’n rhy fach i'w plant i’r ysgol er mwyn eu cynnig i deuluoedd eraill.

Fe wnaeth y Gweinidog Addysg ymweld ag Ysgol Gynradd Gatholig St Michael's ym Mhontypridd yn ddiweddar i weld cynllun ailgylchu a chyfnewid yr ysgol ar waith.

Mae menter 'The Uniform Exchange' yn Ysgol St Michael's yn darparu gwisg ysgol fforddiadwy i ddisgyblion, teuluoedd a’r gymuned yn ystod argyfwng economaidd.