Mae Rygbi Caerdydd wedi cyhoeddi y bydd 16 o chwaraewyr yn gadael ar ddiwedd y tymor - gan gynnwys chwaraewyr rhyngwladol Cymru.

Cyhoeddodd y clwb bod y chwaraewyr yn gadael yn yr haf.

Fe wnaeth Josh Navidi wneud y penderfyniad I ymddeol o rygbi ar ddechrau mis Ebrill oherwydd anaf, ac mae'n un o saith chwaraewr rhyngwladol Cymru sydd yn gadael.

Bydd Kristan Dacey hefyd yn ymddeol o ganlyniad i anaf parhaus.

Dillon Lewis, Rhys Priestland a Willis Halaholo yw'r enwau mwyaf fydd yn gadael Parc yr Arfau ac fe fyddant yn chwilio am glybiau eraill dros yr haf.

Bydd maswr y clwb Jarrod Evans yn ymuno â'r Harlequins tra bod Max Llywellyn wedi arwyddo cytundeb gyda Chaerloyw.

Mae Ray Lee-Lo wedi chwarae i'r clwb ers 2015, ond fe fydd yn gadael y clwb hefyd. Bydd James Ratti, sydd newydd ennill ei gap cyntaf dros Gymru hefyd yn gadael.

Lloyd Williams, Dmitri Arhip, Jason Harries, Joe Peard, Harri Millard, Kirby Myhill a Brad Thyer sydd yn cwblhau'r 16 fydd yn gadael.