Mae dyfais ffrwydrol wedi cael ei thanio o dan reolaeth ar draeth poblogaidd ar Ynys Môn.

Cafodd Gwylwyr y Glannau Rhosneigr a Bangor, yr heddlu a'r Tîm Difa Bomiau eu galw i ddelio gyda'r ddyfais, a gafodd ei darganfod ar draeth Llanddwyn ger Niwbwrch ddydd Sadwrn.

Roedd y ddyfais ffrwydrol yn un o gyfnod yr Ail Ryfel Byd yn ôl Gwylwyr y Glannau Rhosneigr.

Bu'n rhaid cau ardal o'r traeth am gyfnod er mwyn diogelu'r cyhoedd wrth i'r Tîm Difa Bomiau baratoi i danio'r ddyfais.

Mae Gwylwyr y Glannau wedi rhyddhau fideo o'r foment y digwyddodd y ffrwydrad. 

Dywedodd Tîm Gwylwyr y Glannau Rhosneigr: "Fe wnaeth y Tîm Difa Bomiau danio'r ddyfais yn ddiogel.

"Yn dilyn y tanio a chadarnhad gan y Tîm Difa Bomiau, fe wnaeth y timau achub ddychwelyd i'w gorsafoedd.

"Os dewch chi o hyd i rywbeth amheus ar y traeth, gadewch lonydd iddo, ffoniwch 999 a gofynnwch am Wylwyr y Glannau."