Bore da gan dîm Newyddion S4C.

Mae'n ddydd Gwener 21 Mai, ac yn amser am olwg sydyn ar rai o'r prif straeon ar hafan Newyddion S4C, o Gymru a thu hwnt.

Mark Drakeford yn beirniadu anhrefn ardal Mayhill o Abertawe

Mae'r Prif Weinidog, Mark Drakeford, wedi beirniadu'r golygfeydd o anhrefn yn Abertawe nos Iau.  Mae Heddlu De Cymru wedi cadarnhau eu bod yn ymchwilio i achos o anhrefn yn ardal Mayhill o'r ddinas.  Cafodd lluniau a fideos eu rhannu ar gyfryngau cymdeithasol yn dangos ceir yn cael eu rhoi ar dân ac mae'r heddlu yn apelio am wybodaeth gan y cyhoedd.

Dathlu cyhoeddi'r cadoediad yn Gaza - Al Jazeera

Roedd dathliadau ar strydoedd Gaza fore Gwener wrth i gadoediad rhwng Israel a Hamas ddod i rym am 02:00 amser lleol.  Mae'r ymyrraeth gan yr Aifft yn golygu fod 11 diwrnod o wrthdaro bellach wedi dod i ben.

Gwyntoedd o hyd at 70mya yn taro'r gogledd - North Wales Live

Mae rhannau o'r gogledd wedi wynebu hyrddiadau o 70 milltir yr awr dros nos wrth i wyntoedd cryfion achosi amodau heriol ar draws rhannau helaeth o Gymru.  Mae rhybudd tywydd melyn yn parhau mewn grym tan 21:00 nos Wener pan mae disgwyl i'r gwyntoedd ostegu.

Plaid Cymru yn cyhoeddi cabinet cysgodol

Mae Adam Price wedi cyhoeddi cabinet cysgodol newydd Plaid Cymru ddydd Gwener.  Mae'r ad-drefniad yn golygu swyddi newydd i rai o'r Aelodau o'r Senedd a gafodd eu hethol i'r siambr am y tro cyntaf yn yr etholiad bythefnos yn ôl.

Tywysog William yn beirniadu'r BBC dros gyfweliad Diana

Mewn datganiad anarferol i aelod o'r Teulu Brenhinol, mae'r Tywysog William wedi beirniadu'r BBC dros gyfweliad gyda'i fam, y Dywysoges Diana, ar raglen Panorama yn 1995. Mae cyfarwyddwr cyffredinol y BBC, Tim Davie, wedi cyfaddef fod "y broses o sicrhau'r cyfweliad ymhell o'r hyn mae cynulleidfaoedd yn ei ddisgwyl".

Cofiwch ddilyn y datblygiadau diweddaraf ar ap a gwefan Newyddion S4C drwy gydol y dydd.