Mae daeargryn pwerus wedi’i deimlo mewn rhannau o Affganistan, Pacistan ac India ddydd Mawrth.

Dywedodd Adran Feteoroleg Pacistan fod y daeargryn yn mesur 6.8 ar y raddfa, gyda’r uwchganolbwynt ym mynyddoedd Hindu Kush ger talaith anghysbell gogledd Affganistan yn Badakhshan.

EarthQuake AfterShocks

Date : 21/03/2023
Time: 22:43:18
Region: Hindukush Region, Afghanistan
Magnitude:3.7
Depth (km): 156
Latitude: 36.50 N
Longitude: 70.96 E#earthquake pic.twitter.com/kv8hsfClQ9

— Pak Met Department محکمہ موسمیات (@pmdgov) March 21, 2023

Mae Arolwg Daearegol yr Unol Daleithiau (USGS) wedi mesur y maint ychydig yn is, sef 6.5. Dywedodd yr USGS fod yr uwchganolbwynt 40 cilomedr (25 milltir) i'r de-ddwyrain o dref Jurm yn Affganistan, ger y ffiniau â Phacistan a Tajikistan.

Ar hyn o bryd does dim anafiadau na marwolaethau wedi eu cofnodi.

“Hyd yn hyn, diolch i Dduw, ni chafwyd unrhyw newyddion drwg am anafiadau. Rydyn ni’n gobeithio bod holl ddinasyddion y wlad yn ddiogel,”meddai llefarydd ar ran llywodraeth Affganistan, Zabihullah Mujahid, ar Twitter.

Cafodd y daeargryn ei deimlo ym mhrifddinas Affganistan, Kabul, yn ogystal â nifer o ddinasoedd Pacistanaidd, gan gynnwys Islamabad a Lahore.

Y llynedd fe wnaeth daeargryn maint 6.1 yn nwyrain Affganistan ladd fwy na 1,000 o bobl.

Llun: @Akhtar Soomro