Bydd Prif Swyddog Milfeddygol newydd Cymru yn dechrau yn ei rôl ddydd Llun.

Mae Dr Richard Irvine yn ymuno â Llywodraeth Cymru yn dilyn cyfnod fel Dirprwy Brif Swyddog Milfeddygol y DU. 

Mae Mr Irvine wedi bod yn gweithio yn y byd milfeddygol ers mwy na 25 o flynyddoedd, gyda chefndir mewn iechyd a lles anifeiliaid, polisi masnach a milfeddygaeth gwladol. 

Mae ganddo hefyd brofiad o arwain rhaglenni gwyliadwriaeth iechyd anifeiliaid a gwyddoniaeth yn yr Asiantaeth Iechyd Anifeiliaid a Phlanhigion. 

Dywedodd Dr Irvine fod "ffermwyr a milfeddygon ledled Cymru yn gwneud gwaith gwych ac rwy'n edrych ymlaen at eu cyfarfod a'u cefnogi fel Prif Swyddog Milfeddygol Cymru.

"Rydym i gyd wedi ymrwymo i amddiffyn iechyd a lles anifeiliaid a thrwy gydweithio gallwn fynd i’r afael â'r heriau sy'n ein hwynebu a chyflawni ein nodau ar y cyd.

"Mae llawer wedi’i gyflawni yng Nghymru a fy ngwaith i, ochr yn ochr â'r tîm yn Llywodraeth Cymru, yw adeiladu ar hynny."

Ychwanegodd y Gweinidog Materion Gwledig, Lesley Griffiths, y bydd "arweinyddiaeth ac arbenigedd Richard yn hanfodol wrth gyflawni ein nodau uchelgeisiol o ran Iechyd a Lles Anifeiliaid a'n hymrwymiadau yn y Rhaglen Lywodraethu.

"Bydd ei wybodaeth a'i brofiad yn gaffaeliad mawr ac rwy'n edrych ymlaen at weithio gydag ef."