Ddydd Sul bydd chwe chystadleuydd ifanc yn camu ar lwyfan Canolfan y Celfyddydau yn Aberystwyth gyda’r nod o gipio Ysgoloriaeth Bryn Terfel.

O Mirain Haf i Rhys Taylor, Rhian Lois i Rhydian Jenkins, mae Ysgoloriaeth yr Urdd Bryn Terfel wedi rhoi hwb i sawl gyfra disglair.

Bydd y gystadleuaeth yn dychwelyd am y tro cyntaf ers 2019 ar ôl cael ei gohirio o ganlyniad i’r pandemig.

Bydd chwe thalent ifanc yn cystadlu am ysgoloriaeth o £4,000 a fydd yn cael ei chynnal am 6pm yng Nghanolfan y Celfyddydau, Aberystwyth.

Dywedodd Siân Eirian, Cyfarwyddwr Eisteddfod yr Urdd a’r Celfyddydau eu bod nhw’n “hynod o gyffrous” i groesawu’r gystadleuaeth yn ôl.

“Mae’r cystadleuwyr i gyd wedi gweithio’n galed wrth baratoi, ac eisoes wedi elwa o’r profiad drwy gymryd rhan mewn gweithdai meistr gydag arbenigwyr profiadol o fewn eu maes,” meddai.

“Hoffwn ddiolch i’r holl bobl sydd wedi cefnogi’r Urdd i gynnig y profiadau gorau posib i’r chwe cystadleuydd dros yr wythnosau diwethaf. 

“Mae Ysgoloriaeth yr Urdd Bryn Terfel yn gyfle anhygoel i bob un sy’n cystadlu, ac yn blatfform arbennig i’r talentau ifanc hyn.

“Ar ran yr Urdd dymunaf y gorau i bawb sy’n cystadlu – yn bwysicach na dim, mwyhewch y profiad!”

Y cystadleuwyr a’r beirniaid

Dewiswyd y cystadleuwyr gan banel o feirniaid yn seiliedig ar eu llwyddiant yn Eisteddfod yr Urdd Sir Ddinbych 2022.

Y chwech fydd yn mynd ben ben am yr ysgoloriaeth yw:

• Fflur Davies (Cylch Arfon)
• Gwenno Morgan (Aelwyd Llundain)
• Ioan Williams (Adran Bro Taf)
• Mali Elwy (Adran Bro Aled)
• Owain Rowlands (Aelod Unigol Blaenau Tywi)
• Rhydian Tiddy (Cylch Blaenau Tywi).

Image

Fel rhan o’r paratoadau ar gyfer y gystadleuaeth, trefnodd yr Urdd ddosbarthiadau meistr unigol a phenodi mentor i’r chwe cystadleuydd.

Seren y West End Steffan Harri fu’n cynnal dosbarth meistr Fflur Davies, y pianydd talentog Iwan Llywelyn Jones fu’n helpu Gwenno Morgan, a’r dawnsiwr Osian Meilir fu’n cydweithio efo Ioan Williams.

Yr actor Ffion Dafis fu’n rhannu ei phrofiad â Mali Elwy, meistr y trombôn Dafydd Thomas fu’n helpu’r cerddor Rhydian Tiddy, a rhannodd Rhian Lois cyn-enillydd y gystadleuaeth yn 2008, ei chyngor hefo Owain Rowlands.

Yn ogystal, mae’r chwech wedi derbyn sesiynau ymarfer gyda Stifyn Parri a’r Gyfarwyddwraig Angharad Lee i baratoi ar gyfer y gystadleuaeth.

Wedi’r holl baratoi ac edrych ymlaen, mae’r noson fawr bron a chyrraedd. Y panel beirniadu fydd Sioned Terry, Gwennan Gibbard, Barri Gwilliam, Bethan Williams–Jones a Huw Garmon.

Bydd rhaglen uchafbwyntiau Ysgoloriaeth yr Urdd Bryn Terfel yn cael ei ddarlledu Nos Sul, 12 Fawrth am 8yh ar S4C.