Mae'r heddlu wedi cyhoeddi rhagor o fanylion am eu hymchwiliad i geisio dod o hyd i faban ar ôl i gwpl ddiflannu fis Ionawr cyn cael eu harestio nos Lun.  

Mae Constance Marten, 35, a Mark Gordon, 48, wedi eu harestio ar amheuaeth o ddynladdiad drwy esgeulustod difrifol, ond mae'r babi oedd gyda nhw, yn dal i fod ar goll.

Yn ôl yr heddlu, gallai'r baban fod wedi cael niwed. 

Mewn datganiad newyddion brynhawn Mercher, dywedodd yr heddlu fod y baban wedi ei weld ddiwethaf yn Newhaven ar 8 Ionawr.

Yn ôl y Ditectif Uwcharolygydd Lewis Basford, mae ymchwiliad trylwyr ar y gweill gyda hyd at 900 milltir sgwâr yn cael ei archwilio. 

Ychwanegodd mai Heddlu'r Met sy'n arwain yr ymchwiliad bellach a bod plismyn wedi bod yn archwilio ardaloedd Newhaven a dwyrain a gogledd Brighton.    

Ansicr

Mae'r heddlu wedi cael 36 awr yn ychwanegol i holi Constance Marten a Mark Gordon yn y ddalfa.

Roedd y cwpl wedi bod ar goll ers i'w car gael ei ddarganfod yn llosgi ar y M61 ger Bolton ar 5 Ionawr, ar ôl genedigaeth y  babi.

Yn ystod yr wythnosau canlynol, symudodd y ddau o gwmpas y DU, a chael eu gweld yn Lerpwl, Essex, dwyrain Llundain a Sussex. 

Dywedodd yr heddlu eu bod nhw'n ansicr a gafodd y babi ei eni yn gynnar neu gydag unrhyw broblemau iechyd gan nad yw wedi derbyn unrhyw driniaeth feddygol ers cael ei eni.