Mae pum cyn-aelod o Heddlu Memphis yn yr UDA wedi pledio'n ddieuog i lofruddiaeth Tyre Nichols, wrth ymddangos yn y llys am y tro cyntaf. 

Bu farw Mr Nichols, 29, ar ôl cael ei arestio ym Memphis ar 7 Ionawr. 

Cafodd fideo o'i arést ei rhannu gan yr heddlu, gan ddangos pum heddwas yn ei bwnio, ei gicio a'i daro gyda baton. 

Yn sgil y digwyddiad, cafodd Tadarrius Bean, Demetrius Haley, Desmond Mills Jr, Emmitt Martin III a Justin Smith eu diswyddo o'r llu a'u cyhuddo o lofruddiaeth. 

Ond wrth ymddangos yn y llys am y tro cyntaf ddydd Gwener, fe wnaeth y pum cyn-heddwas wadu cyhuddiadau o lofruddiaeth yn yr ail radd. 

Fe wnaeth y pum dyn hefyd bledio'n ddieuog i gyhuddiadau o herwgipio, ymosodiad, camymddygiad swyddogol a gormes swyddogol. 

Fe wnaeth marwolaeth Mr Nichols sbarduno protestiadau ar draws yr UDA, gan gynnwys ym Memphis, yn erbyn ymddygiad yr heddlu. 

Llun: Swyddfa Heddlu Shelby County