Mae colli’r categori Cymraeg yng Ngwobrau Podledu Prydain yn siom, meddai un cynhyrchydd. 

Wrth siarad â Newyddion S4C dywedodd Aled Jones, cynhyrchydd YPod.Cymru bod y gwobrau wedi bod yn llwyfan iaith a thalent. 

Mae Gwobrau Podlediad Prydain yn seremoni wobrwyo flynyddol gyda'r bwriad o ddathlu cynnwys rhagorol o fewn y byd podlediadau Prydeinig. 

Yn flynyddol mae’r categori ‘Podlediad Gorau Yn Yr Iaith Gymraeg’ wedi bod yn rhan o’r gwobrau. 

Mae categoriau eleni wedi eu cyhoeddi ac nid yw’r wobr am y ‘Podlediad Gorau Yn Yr Iaith Gymraeg’ ar y rhestr. 

“Dwi wedi cysylltu gyda’r cwmni newydd sydd yn rhedeg y gwobrau eleni. A dwi wedi cael e-bost yn nôl yn dweud bod rhai newidiadau wedi eu gwneud eleni sy’n golygu bod nhw wedi gollwng y categori,” meddai Aled.

“Mae’n siom, yn bersonol fi’n teimlo bod podlediadau Cymraeg wedi elwa lot mas o gael categori a’i rhoi ar lwyfan Prydeinig. Roedd y wobr yn blatfform grêt i bodlediadau Cymraeg a'r iaith.”

Ymysg y podediadau sydd wedi cael llwyddiant yn y gwobrau mae Dewr, podlediad gan Tara Bethan a Gwrachod Heddiw gan Mari Elen. 

Image

Roedd Aled hefyd ymysg y panel oedd yn beirniadu yn y categori. 

Dwi wedi bod yn rhan o’r panel beirniadu i’r categori gyda Siân Eleri o BBC Radio 1 a Sali Collins o Brifysgol Gaerdydd ac roedd lot o bobl yn ceisio am y wobr.

“Roedd hi’n wobr wych i’r iaith Gymraeg, ac roedd enillwyr yn mynd fyny ar y llwyfan ac yn diolch yn y Gymraeg. Dwi’n teimlo bod llwyfan o’r fath wedi codi safon podlediadau Cymraeg. 

“Mae e yn gam yn nôl, achos bod llai o amrywiaeth mewn gwobrau Prydeinig.”

Mae Newyddion S4C wedi cysylltu â Gwobrau Podledu Prydain yn gofyn am eu hymateb.