Mae cynghorydd tref wedi mynegi pryder fod enwau Saesneg yn cael eu “dileu” yn y Drenewydd.

Dywedodd Jackie Molloy Davies ei bod hi’n ofni y byddai enwau Cymraeg yn anoddach i ffoaduriaid eu hynganu.

Daeth ei sylwadau wrth i Gyngor Tref Y Drenewydd a Llanllwchaearn groesawu cais gan Gyngor Sir Powys i newid enw cyn iard Travis Perkins Millers Place i Blas Melinydd.

“Does gen i ddim problem o gwbl achos es i i ysgol Gymraeg fy hun ond yr hyn rwy’n poeni yn ei gylch yw bod llawer o ffoaduriaid yn dod yma,” meddai Jackie Molloy Davies wrth y Powys County Times.

“Maen nhw yn dysgu Saesneg yn unig a dwi’n teimlo drostyn nhw bod ynganiad y Gymraeg yn gallu bod yn anodd.

"Dwi braidd yn bryderus ein bod ni'n dileu'r Saesneg allan o'r enwau lleoedd ac mae'r bobl yma'n dod yma i ddysgu Saesneg cyn dysgu Cymraeg.

“Ac os ydyn nhw'n cael cartref yn yr eiddo yma fe fydd yn anodd iddyn nhw. Dwi'n poeni am yr agwedd yna."

Derbyn

Mae disgwyl y bydd y datblygiad newydd rhwng Eglwys Dewi Sant a Chroesawdy yn y dref yn cynnwys 32 o fflatiau fforddiadwy o fewn bloc pedwar llawr.

Roedd cynghorwyr wedi awgrymu y dylai'r tai ynni effeithlon newydd sy'n cael eu hariannu'n rhannol gan Lywodraeth Cymru gael enw Cymraeg.

Er gwaethaf pryderon Jackie Molloy Davies penderfyniad dderbyn yr enw Cymraeg yn unig.