Newyddion S4C

Cymru

Cwpan y Byd: Yr aros bron ar ben i Gymru

NS4C 21/11/2022

Mae'r aros ar ben. 

Ar ôl 64 mlynedd fe fydd Cymru'n chwarae eu gêm gyntaf yng Nghwpan y Byd ers 1958, gan wynebu'r UDA yn Stadiwm Al Rayyan. 

Mae'r daith wedi bod yn un anodd, gan gynnwys methiannau agos a thorcalonnus yn 1993 a 2017. 

Yng nghanol y cyffro o gyrraedd Qatar, mae her enfawr yn wynebu carfan Rob Page wrth iddynt geisio dod i'r brig yn Grŵp B a chyrraedd y rowndiau terfynol.

Bydd y dynion mewn coch yn wynebu'r UDA, Iran a Lloegr, gyda'r gêm gyntaf nos Lun. 

Beth allwn ni ddisgwyl? 

Bydd 19:00 nos Lun yn foment hanesyddol i Gymru wrth iddynt wynebu UDA ar lwyfan mwya'r byd am y tro cyntaf ers 1958.

Er nad yw'r Americanwyr yn chwarae yn gyson, mae'r capten Christian Pulisic yn chwarae ar y lefel uchaf gyda Chelsea.

Mae yna sawl chwaraewr arall sydd â phrofiad o chwarae yn Ewrop, fel Weston McKennie gyda Juventus a Sergiño Dest gydag AC Milan. Fe allai'r ddau yma beri  gofid i Gymru. 

Mae Cymru yn dibynnu ar sêr sydd bellach ddim yn chwarae i rai o dimau mwyaf Ewrop, wedi i Gareth Bale symud i Los Angeles FC ac Aaron Ramsey i Nice.  

Mewn cynhadledd i'r wasg yn Doha brynhawn dydd Sul fe gadarnhaodd rheolwr Cymru Robert Page na fyddai Joe Allen yn cymryd rhan y gêm gyntaf. 

Wrth i'r gic gyntaf agosáu mae'r Wal Golch yn gobeithio am gystadleuaeth i'w chofio. 

Bydd holl gemau Cymru yn y bencampwriaeth i'w gweld yn fyw ar S4C. 

Llun: Asiantaeth Huw Evans

This website uses cookies to ensure you get the best experience on our website.