Newyddion S4C

Taflegrau'n taro dinasoedd ar hyd a lled Wcráin

15/11/2022
wcrain

Mae nifer o ddinasoedd yn Wcráin wedi dioddef ymosodiadau gan daflegrau lluoedd Rwsia ddydd Mawrth, gan gynnwys y brif ddinas Kyiv.

Roedd adroddiadau fod taflegrau wedi taro dinasoedd Kharkiv a Lviv hefyd, ac fe ddywedodd maer Kyiv, Vitali Klitschko, fod dau adeilad wedi ei ddifrodi yn ardal Pechersk o'r ddinas.

Dywedodd arlywydd y wlad, Volodymyr Zelensky, fod disgwyl rhagor o ymosodiadau dros y dyddiau nesaf.

Hyd yma mae 100 o daflegrau wedi glanio ac mae cyflenwadau trydan mewn nifer o ardaloedd wedi eu heffeithio o ganlyniad i'r ymosodiadau diweddaraf.

Yn gynharach ddydd Mawrth fe wnaeth yr Arlywydd Zelensky annerch cyfarfod cynhadledd y G20 dros gyswllt fideo - gan gyfeirio at gyfarfod y G19.

Ei fwriad wrth gyfeirio at y G19 yn lle'r 20 aelod o'r gynhadledd oedd anwybyddu presenoldeb Rwsia a Gweinidog Tramor y wlad honno yn y gynhadledd yn Bali, sef Sergei Lavrov.

Mae disgwyl i arweinwyr y G20 gyhoeddi datganiad ar y cyd yn beirniadu'r rhyfel yn Wcráin, gan ddatgan fod y sefyllfa yn creu ansefydlogrwydd economaidd byd eang.

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.