Newyddion S4C

Los Blancos

Los Blancos yn rhyddhau cân S4C ar gyfer Cwpan y Byd

NS4C 03/11/2022

Mae'r band Los Blancos wedi ysgrifennu cân arbennig ar gyfer S4C er mwyn dathlu taith hanesyddol Cymru i Gwpan y Byd. 

O'r enw 'Bricsen Arall', mae'r gân yn cyfeirio at gefnogwyr brwd y Wal Goch yn aros am yn hir i weld Cymru yn cystadlu ar y llwyfan rhyngwladol mwyaf unwaith eto. 

Mae'r band o Sir Gaerfyrddin yn ddilynwyr brwd o'r tîm cenedlaethol ac wedi ceisio defnyddio eu hangerdd yn y gân. 

Dywedodd Dewi Jones, gitarydd bas Los Blancos, fod y penderfyniad i ysgrifennu cân ar gyfer S4C yn "no brainer."

"Ni wedi cael cyfle gwych gan S4C i recordio cân i nodi Cwpan y Byd, a gobeithio caiff e dipyn o sylw," meddai.

"Dwi'n gobeithio fod ffans Cymru yn meddwl fod e'n gân eitha' catchy a bod pobl yn gallu canu ymlaen gyda fe.

"A gobeithio cawn ni berfformio hwn yn y stadiwm pan fydd Cymru yn qualifyio i Gwpan y Byd 2062, fel Dafydd Iwan!"

Bydd y gân ar gael i'w gwrando ar wasanaethau ffrydio poblogaidd fel iTunes, Spotify ac Apple Music a bydd fideo swyddogol yn cael ei gyhoeddi ar sianel YouTube S4C yn ddiweddarach.

This website uses cookies to ensure you get the best experience on our website.