Newyddion S4C

Dover (PA)

'Bomiau petrol wedi eu taflu' at ganolfan brosesu mudwyr yn Dover

NS4C 30/10/2022

Mae adroddiadau fod bomiau petrol wedi eu taflu at ganolfan brosesu mudwyr yn Dover, Caint.

Cafodd yr heddlu eu galw i'r digwyddiad am ychydig wedi 11:20 fore dydd Sul, ar ôl i ddyn daflu dyfeisiadau at ganolfan brosesu'r Viaduct.

Dywed Heddlu Caint fod un dyn wedi ei anafu yn ystod y digwyddiad.

Mae asiantaeth newyddion Reuters yn adrodd fod y dyn oedd yn gyfrifol am daflu'r dyfeisiadau wedi lladd ei hun, ond nid yw'r heddlu wedi cadarnhau hyn.

Dywedodd llefarydd ar ran y Swyddfa Gartref: “Rydym yn ymwybodol o ddigwyddiad yn Western Jet Foil, Dover, ac mae’r heddlu’n bresennol.

“Ni fyddai’n briodol gwneud sylw pellach ar hyn o bryd.”

Cadarnhaodd Gwasanaeth Tân ac Achub Caint fod eu criwiau wedi diffodd tanau yn y lleoliad.

Dywedodd Nathalie Elphicke, AS Ceidwadol Dover, ei bod hi wedi cael “sioc enbyd” o glywed y newyddion.

 

This website uses cookies to ensure you get the best experience on our website.