Mae teulu beiciwr fu farw mewn gwrthdrawiad ym Mhort Talbot wedi rhoi teyrnged iddo.

Bu farw Michael Blake, 38, mewn gwrthdrawiad gyda Vauxhall Astra ddydd Iau am 06:40 ar Ffordd Cwmafan wrth gyffordd London Row.

Roedd Michael yn wreiddiol o Gasnewydd ond yn byw yn ardal Taibach ym Mhort Talbot. Mae ei bartner Michelle wedi ei ddisgrifio fel dyn "â chalon wedi gwneud o aur."

"Roedd gan Michael bersonoliaeth wych... tu ôl i ddrysau caeedig roedd â chalon wedi ei gwneud o aur. Byddai'n fodlon gwneud unrhywbeth i mi beth bynnag yr oeddwn yn ei ofyn. Roedd yn caru'r awyr agored, pysgota, gwersylla a reidio ei feic."

Ychwanegodd y byddai ei holl deulu'n ei golli'n fawr a fod wi farwolaeth wedi "gadael bwlch yn ein calonnau na fydd fyth yn cael ei lenwi."

Cafodd dyn 33 oed o Faesteg ei arestio a'i ryddhau gan yr heddlu wrth i'r ymchwiliad i'r digwyddiad barhau.

Mae Heddlu De Cymru yn apelio am unrhyw dystion a welodd y digwyddiad i gysylltu â nhw gan ddefnyddio'r cyfeirnod 2200363911.