Newyddion S4C

S4C

Hebrwng Kanye West o swyddfa Skechers ar ôl cyrraedd yn 'ddiwahoddiad'

NS4C 27/10/2022

Cafodd Kanye West ei hebrwng o swyddfa gorfforaethol Skechers yn Los Angeles ar ôl cyrraedd “yn ddirybudd a heb wahoddiad”, yn ôl y brand esgidiau.

Dywedodd y cwmni fod y rapiwr o’r Unol Daleithiau, sydd wedi newid ei enw yn gyfreithiol i Ye wedi’i orfodi i adael y safle gan ei fod yn “ffilmio heb awdurdod”.

Ychwanegodd Skechers nad oes ganddynt “unrhyw fwriad” i weithio gyda’r rapiwr.

Fe wnaeth Skechers gondemnio sylwadau gwrth-semitaidd diweddar Kanye West.  

Mewn datganiad, dywedodd Skechers: “Cyrhaeddodd Kanye West - y cyfeirir ato hefyd fel Ye - yn ddirybudd a heb wahoddiad yn un o swyddfeydd corfforaethol Skechers yn Los Angeles.

“Gan ystyried bod Ye yn ffilmio heb awdurdod, fe wnaeth dau o swyddogion gweithredol Skechers ei hebrwng ef a’i barti o’r adeilad ar ôl sgwrs fer.

“Nid yw Skechers yn ystyried ac nid oes gennym unrhyw fwriad i weithio gyda West. Condemniwn ei sylwadau cynhennus diweddar ac nid ydym yn goddef gwrth-semitiaeth.

Ddydd Mawrth, dywedodd Adidas ei fod yn stopio cynhyrchu brand Yeezy, sef cynhyrchiad ar y cyd gyda Kanye West ar unwaith.

Fe wnaeth y cwmni ffasiwn Balenciaga hefyd dorri cysylltiadau ag Ye yr wythnos diwethaf, yn ôl adroddiadau.

Ddydd Mercher, dywedodd Madame Tussauds yn Llundain ei bod wedi symud ei ffigwr o olwg y cyhoedd ac i archif yr amgueddfa.

Cafodd West ei feirniadu yn gynharach y mis hwn am wisgo crys-T “White Lives Matter” i ddangosiad ei gasgliad diweddaraf yn Wythnos Ffasiwn Paris.

Mae ei gyn- wraig, Kim Kardashian ac aelodau o’i theulu wedi galw arno i roi’r gorau i’r “trais ofnadwy ” tuag at y gymuned Iddewig.

This website uses cookies to ensure you get the best experience on our website.