Bydd Côr Ffermwyr Hawkstone, a enillodd Britain’s Got Talent 2026, yn perfformio yn Sioe Frenhinol Cymru 2026.

Cafodd y côr ei sefydlu gan Jeremy Clarkson yn wreiddiol fel rhan o ymgyrch hysbysebu ar gyfer Hawkstone, brand diodydd Clarkson.

Bydd y côr yn canu yn y Prif Gylch yn Llanelwedd ar brynhawn Llun 20 Gorffennaf, sef diwrnod agoriadol y sioe.

Mae deg aelod o’r côr o Gymru, gan gynnwys y tenor adnabyddus Aled Wyn Davies.

Ers hynny, mae’r côr wedi datblygu i fod yn grŵp sy’n codi ymwybyddiaeth am iechyd meddwl ac unigrwydd yn y gymuned amaethyddol.

Fe enillodd y côr ar y rhaglen Britain’s Got Talent ar ITV ym mis Mai 2026.

Dywedodd Aled Rhys Jones, Prif Weithredwr Cymdeithas Amaethyddol Frenhinol Cymru: “Rydyn ni’n falch iawn o groesawu Côr Ffermwyr Hawkstone i'r Sioe Frenhinol.

“Bydd eu perfformiad ar y dydd Llun yn y Brif Gylch, o flaen miloedd o ymwelwyr, yn achlysur gwirioneddol arbennig.

“Dyma fydd eu perfformiad swyddogol cyntaf yng Nghymru ers ennill rownd derfynol Britain's Got Talent, ac rydyn ni’n gyffrous dros ben i rannu'r foment honno gyda'n cynulleidfa.”

Dywedodd prif unawdydd benywaidd y côr, Rosie Jones, sy’n ffermwr bîff a defaid o Bowys, ei bod yn “anrhydedd o’r mwyaf” cael gwahoddiad i ganu yn y sioe.

“Mewn cyfnod o galedi, ansicrwydd ac unigrwydd, mae'r côr wedi dod yn lle i gysylltu, cefnogi a deall,” meddai.

“Os yw ein taith yn ysbrydoli eraill neu'n helpu hyd yn oed un unigolyn, yna rydyn ni'n falch dros ben o hynny.”