Mae’r gymnastwraig o Gaerdydd, Ruby Evans, wedi dweud bod ennill Pencampwriaethau Gymnasteg Artistig Prydain wedi bod yn brofiad “anhygoel”.

Daeth Evans y Gymraes gyntaf i ennill y brif bencampwriaeth ym Mhencampwriaethau Prydain ers 55 mlynedd ar ôl gorffen ar frig y gystadleuaeth yn Lerpwl ddydd Sadwrn.

Daw'r fuddugoliaeth hanesyddol ychydig ddyddiau’n unig ar ôl i’r cyn-ddisgybl Ysgol Gyfun Gymraeg Plasmawr ddathlu ei phen-blwydd yn 19 oed.

Dros benwythnos hynod lwyddiannus, fe enillodd cystadleuaeth y llawr hefyd.

Mewn neges ar Instagram, dywedodd Evans: “Am Bencampwriaethau Prydeinig anhygoel, yn ennill teitl Pencampwr Prydain, a Phencampwr y llawr.

“Ac hefyd y canlyniad annisgwyl o gyrraedd ffeinal y bar!

“Diolch i bawb am eich cefnogaeth dros y penwythnos, fe wnes i garu cwrdd â chi.”

Inline Tweet: https://twitter.com/NewyddionS4C/status/1983514837612146737?s=20

Yn 18 oed, Ruby oedd y Gymraes gyntaf i ennill medal mewn cystadleuaeth unigol ym Mhencampwriaeth Gymnasteg y Byd y llynedd.

Mewn cyfweliad gyda Newyddion S4C ar y pryd, dywedodd: "Dwi’n rili hapus i gael y medal arian a dwi’n gyffrous i beth sy’n dod nesaf."

Y gobaith eleni yw y bydd Evans yn cynrychioli Cymru yng Ngemau’r Gymanwlad yn Glasgow, sy'n cychwyn ym mis Gorffennaf.

Llun: Ruby Evans ar ôl ennill Pencampwriaeth Prydain (British Gymnastics)