Mae teulu dyn 34 oed fu farw mewn gwrthdrawiad yn Sir Benfro yr wythnos diwethaf wedi rhoi teyrnged iddo. 

Bu farw Andrew Clark yn y fan a'r lle wedi gwrthdrawiad rhwng pedwar cerbyd ar Ffordd Freeman yn nhref Hwlffordd ar 26 Awst.

Dywedodd ei deulu mewn teyrnged ei fod yn "rhy ifanc o lawer i gael ei gymryd, ac roedd llawer mwy o fywyd ar ôl gydag ef i fyw".

"Roedd Andrew’n dad cariadus a oedd yn meddwl y byd o’i ddwy ferch. Gweithiodd yn galed i ddarparu ar eu cyfer, ac roedd yn garedig, hael, ac yn barod i helpu eraill," meddai'r teulu,

Ychwanegodd ei deulu ei fod yn "dynnwr coes ac wrth ei fodd yn cael sbort a chellwair!"

"Bydd ei deulu a’i ffrindiau’n gweld eisiau Andrew’n fawr."

Mae'r heddlu'n apelio ar unrhyw un sydd â gwybodaeth am y digwyddiad i gysylltu â nhw gan ddefnyddio'r cyfeirnod DP-20220826-338.