Plaid Cymru yn lansio ei hymgyrch ar gyfer yr etholiadau lleol
08/04/2022
Mae Plaid Cymru yn lansio ei hymgyrch yn yr etholiadau lleol yng Nghonwy ddydd Gwener.
Wrth lansio'r ymgyrch yn swyddogol, fe fydd y blaid yn pwysleisio mai prydau ysgol am ddim, diogelu swyddi a'r argyfwng hinsawdd fydd ei phrif flaenoriaethau.
Mae disgwyl i arweinydd Plaid Cymru, Adam Price, ganmol record cynghorau ei blaid gan ddweud y bydd polisïau'r blaid yn "adnabod y problemau" ac yn "cynnig atebion".
Un o brif addewidion Mr Price fydd ymrwymiad i ddarparu cinio ysgol am ddim i ddisgyblion uwchradd ymhob cyngor dan arweiniad Plaid Cymru - a hynny yn ystod tymor nesaf y cyngor.
Bydd y blaid hefyd yn amlinellu polisïau i fynd i'r afael ag "argyfwng" tai Cymru drwy adeiladu mwy o gartrefi gwirioneddol fforddiadwy sydd yn ynni-effeithlon.
Ar hyn o bryd, mae gan Blaid Cymru fwyafrif ar un o gynghorau Cymru, sef Gwynedd.
Wrth siarad cyn y lansiad, dywedodd Adam Price: "Mae Cymru’n wynebu sawl her wrth wynebu’r etholiad hwn -heriau sy'n gofyn am leisiau lleol cryf sy'n gwrthod derbyn hyn cystal ag y mae'n ei gael i'n cymunedau."
Fe fydd modd i bleidleiswyr fwrw pleidlais yn yr etholiadau lleol ar 5 Mai.
Llun: Plaid Cymru (Flickr)
Etholiadau lleol - ymgyrch y pleidiau:
