Mae'r Ceidwadwyr Cymreig yn lansio eu hymgyrch etholiadau lleol yn Llandudno ddydd Iau.

Mae 669 o ymgeiswyr yn sefyll ar ran y blaid yn yr etholiadau - dywed y blaid mai dyma fydd y nifer uchaf erioed. 

Mae'r blaid yn dweud na fyddan nhw'n gwastraffu arian trethdalwyr ar "brosiectau gwag Llafur".

Wrth lansio'r ymgyrch, dywed y blaid y byddan nhw'n "gwrando ar anghenion cymunedau lleol a gweithio gyda nhw".

Ar hyn o bryd, mae gan y Ceidwadwyr reolaeth o un cyngor yng Nghymru, sef Sir Fynwy.

Dywedodd Arweinydd y Ceidwadwyr yn y Senedd Andrew RT Davies: "Ar draws Cymru, mae cynghorwyr y Ceidwadwyr Cymreig yn gweithio'n galed i gyflawni ar ran eu cymunedau. 

"Dwi wrth fy modd y bydd mwy o bobl nag erioed o'r blaen yn gallu pleidleisio o blaid pencampwyr lleol a fydd yn darparu cymunedau cryfach, mwy diogel."

Fe fydd modd i bleidleiswyr fwrw pleidlais yn yr etholiadau lleol ar 5 Mai.

Llun: Ceidwadwyr Cymreig (YouTube)

Etholiadau lleol - ymgyrchau'r pleidiau

• Y Blaid Werdd yn amlinellu eu cynlluniau i leddfu costau byw
• Mark Drakeford yn lansio ymgyrch etholiadau lleol Llafur
• Plaid Cymru yn lansio ei hymgyrch ar gyfer yr etholiadau lleol