Mae'r awdur Mair Garnon James wedi marw.

Cafodd ei magu yn Llandudoch yn Sir Benfro ac fe dreuliodd oes yn gwasanaethu ei hardal leol.

Roedd ei llyfrau yn cynnwys y gyfrol Hiwmor Sir Benfro, rhan o gyfres Ti'n Jocan y cyhoeddwr Y Lolfa.

Roedd hefyd yn wyneb a llais amlwg mewn nosweithiau llawen ar hyd a lled y wlad, gan deithio pellteroedd maith yn creu adloniant ar hyd y blynyddoedd.

Fe ddywedodd yr awdur Emyr Llywelyn mewn rhagair i un o'i llyfrau mai Mair oedd "brenhines digrifwyr Dyfed".

Bu'n athrawes am nifer o flynyddoedd cyn ymddeol ar ddechrau'r 1990au.

Mewn neges gan dudalen Facebook cymuned Llandudoch, cafodd ei disgrifio fel "un a fu'n gefn i fywyd cymunedol a diwylliannol Llandudoch".

Mae'n gadael tri o blant, Carys, Meinir ac Emyr.