Mae awyrennau yr RAF a Ffrainc wedi cynnal ymosodiad ar y cyd ar safle tanddaearol yn Syria.

Roedd y safle wedi’i feddiannu gan y Wladwriaeth Islamaidd, meddai’r Weinyddiaeth Amddiffyn.

Defnyddiwyd bomiau i dargedu nifer o dwneli mynediad i lawr i’r safle, a leolir yn y mynyddoedd i’r gogledd o ddinas Palmyra yng nghanol y wlad, nos Sadwrn.

Roedd y safle wedi cael ei ddefnyddio yn fwyaf tebygol i storio arfau a ffrwydron, ac nid oedd sifiliaid yn byw yn yr ardal gyfagos, meddai Llywodraeth y DU.

Mae asesiad manwl ar y gweill ac mae arwyddion cychwynnol bod amcanion yr ymosodiad wedi llwyddo yn ôl swyddogion.

Dywedodd yr Ysgrifennydd Amddiffyn John Healey fod y DU yn benderfynol o “sefyll ysgwydd wrth ysgwydd gyda’n cynghreiriaid” i “rhwygo unrhyw adfywiad” o’r mudiad terfysgol, a elwir hefyd yn Daesh.

Dywedodd:“Mae’r ymgyrch hon, i ddileu terfysgwyr peryglus sy’n bygwth ein ffordd o fyw, yn dangos sut mae ein lluoedd arfog yn barod i gamu ymlaen, drwy gydol y flwyddyn, gan gadw Prydain yn ddiogel gartref ac yn gryf dramor.”

Llun: PA/MoD