Daeth Jonny Clayton yn fuddugol yn Uwch Gynghrair y Dartiau nos Iau er gwaethaf y ffaith ei fod yn dioddef gyda gowt yn ei ffêr.

Mae’r Cymro wyth pwynt yn glir o’i gystadleuwyr yn nhabl y gystadleuaeth ar ôl iddo ennill 6-1 yn y rownd derfynol yn Nottingham yn erbyn cyn bencampwr y byd, Luke Humphries.

Ond ar ôl y fuddugoliaeth, dywedodd y gŵr o Bontyberem ei fod wedi bod yn noson anodd iddo wrth geisio ymdopi â’r poen.

"Do’n i ddim yn disgwyl llawer i fod yn onest. Roeddwn i’n diodde' 'da gowt yn fy ffêr," meddai.

"Roedd ychydig yn anodd, ond roedd y fraich yn iawn a dyna’r peth pwysicaf."

Inline Tweet: https://twitter.com/NewyddionS4C/status/2032226240363450680?s=20

Roedd y Ferret, a enillodd yr Uwch Gynghrair yn 2021, wedi curo Michael van Gerwen a Stephen Bunting 6-3 ar y ffordd i’r rownd derfynol nos Iau.

Wedi chwe rownd o’r Uwch Gynghrair, dyma’r ail noson iddo ennill hyd yn hyn. Gyda Clayton ar frig y tabl, mae ei gyd-Gymro, Gerwyn Price, yn y trydydd safle.

"Dyma fy hoff gystadleuaeth," ychwanegodd Clayton. "Rwy’n caru ‘e. Rwy’n gobeithio fy mod i’n profi pam dylwn i fod ynddo fe, a bod fy nartiau yn gwneud y siarad."