Mae dyn 38 oed wedi cael ei ryddhau ar fechniaeth ar ôl i ddyn arall farw mewn gwrthdrawiad ger y Bala.

Mae’r heddlu yn parhau i apelio am dystion i'r digwyddiad ar yr A494 yn Llanfor tua 23.40 ddydd Mercher.

Bu farw cerddwr, dyn 43 oed, yn y fan a'r lle. Mae perthnasau agosaf y dyn wedi cael gwybod.

Roedd dyn 38 oed wedi cael ei arestio mewn cysylltiad â'r digwyddiad ar amheuaeth o achosi marwolaeth trwy yrru'n beryglus.

Dywedodd yr heddlu brynhawn ddydd Gwener ei fod bellach wedi ei ryddhau ar fechniaeth.

Dywedodd yr uwch swyddog ymchwilio, y Prif Arolygydd Ditectif Andrew Gibson: “Mae ein cydymdeimlad yn parhau â theulu'r dyn yn ystod y cyfnod anodd hwn.

“Rwy'n parhau i apelio ar unrhyw un a oedd yn gyrru ar hyd yr A494 ddydd Mercher 3 Rhagfyr, rhwng 23.00 a hanner nos, ac a allai fod â lluniau camera dashfwrdd, i gysylltu cyn gynted â phosibl."

Mae modd cysylltu â Heddlu Gogledd Cymru drwy'r wefan neu drwy ffonio 101, gan ddyfynnu'r rhif digwyddiad 25000989380.