Fe fydd trafodaethau i geisio dod â’r rhyfel rhwng Rwsia a Wcráin i ben yn parhau yn Miami ddydd Iau, yn ôl y Tŷ Gwyn.

Bu llysgennad arbennig yr UDA, Steve Witkoff, a Jared Kushner, sy’n fab-yng-nghyfraith i Arlywydd America Donald Trump, yn Moscow ddydd Mawrth ar gyfer trafodaethau gydag Arlywydd Rwsia, Vladimir Putin.

Yn ôl y Kremlin, nid oedd “unrhyw gyfaddawd” yn dilyn y trafodaethau.

Dywedodd Arlywydd America Donald Trump fod y trafodaethau wedi bod yn “gymharol dda”, ond ei fod yn rhy gynnar i ddweud beth fydd yn digwydd.

Fe gyhuddodd Gweinidog Tramor Wcráin, Andrii Sybihya, Putin o “wastraffu amser y byd”, gan apelio ar Rwsia i ddod â’r rhyfela i ben.

Pan ofynnwyd iddo a oedd yn credu bod Putin wirioneddol yn dymuno dod â’r rhyfel i ben yn dilyn y trafodaethau yn Moscow, atebodd Trump: “Mae [Putin] eisiau dod â’r rhyfel i ben. Dyna oedd eu hargraff nhw.”

Mae Arlywydd Wcráin, Volodymyr Zelensky, wedi cadarnhau y bydd trafodaethau rhwng Wcráin ac America yn cael eu cynnal “yn y dyddiau nesaf”.

Ar ei gyfrif ar y cyfryngau cymdeithasol X, fe ddywedodd: “Nawr, mae’r byd yn teimlo fel bod yna gyfle gwirioneddol i ddod â’r rhyfel i ben.”

Daw’r trafodaethau yn Miami yn dilyn dyddiau o gyfarfodydd rhwng arweinwyr Wcráin ac Ewrop, yn sgil pryderon fod y cytundeb heddwch cychwynnol yn cyd-fynd yn ormod â gofynion Rwsia.

Credir bod Wcráin a Rwsia yn parhau i anghytuno dros ddau brif bwynt: dyfodol y tiriogaeth sydd wedi’i meddiannu gan luoedd Rwsia, a gwarantau diogelwch i Wcráin.

Mae Kyiv ac arweinwyr Ewropeaidd yn credu mai drwy sicrhau aelodaeth Wcráin o NATO y byddai’r ffordd fwyaf effeithiol o atal Rwsia rhag ymosod eto yn y dyfodol.

Mae Rwsia yn gwrthwynebu’r cynnig yn chwyrn, gyda Trump hefyd yn awgrymu na fyddai’n ystyried caniatáu i Wcráin ymaelodi.

Dyma un o’r prif bwyntiau a gafodd eu trafod yn Moscow, yn ôl y Kremlin.

Fe ychwanegodd swyddog polisi tramor Rwsia, Yuri Ushakov, fod llwyddiannau diweddar gan luoedd Rwsia wedi cryfhau eu safle wrth gynnal y trafodaethau.