Fe fydd cerflun o seren y gyfres Monty Python, Terry Jones yn chwarae’r organ tra’n noethlymun yn cael ei ddadorchuddio ym Mae Colwyn yn y flwyddyn newydd.

Fe gafodd y comedïwr, a fu farw yn 77 oed yn 2020, ei eni a’i fagu ym Mae Colwyn cyn symud i Loegr pan oedd yn bedair oed.

Un o gymeriadau mwyaf enwog Jones oedd yr organydd noethlymun a ymddangosodd ar Monty Python’s Flying Circus yn 1972.

Fe lwyddodd ffans y gyfres i godi £120,000 mewn chwe mis ar gyfer y gwaith gan y cerflunydd Nick Elphick, sydd â’i stiwdio i lawr y ffordd yn Llandudno.

Mae bellach wedi llwyddo i fwrw cast o’r cerflun clai yn ei stiwdio, a bydd yn cael ei ddatgelu ar y prom ym mis Ebrill 2026, gyda chefnogaeth sêr y gyfres, Michael Palin a Terry Gilliam, a hefyd teulu Terry Jones.

“Dyma’r anrhydedd fwyaf i mi erioed,” meddai Nick Elphick wrth ITV. “Rwy’n addoli Terry Jones yn llwyr.

“Mae’n beth rhyfedd i’w ddweud, ond pe bawn i’n marw fory, fe fyddwn i’n marw yn hapus.

“Mae’n rhywbeth mor anhygoel i’r ardal leol, oherwydd ei fod yn dod ag o’n ôl i Fae Colwyn.

“Mae’n anrhydedd i fi, ac mae’n anrhydedd iddo fo, oherwydd dyna’n union yr oedd ei eisiau yn ei fywyd.

“Roedd yn siarad yn gyson am fod yn Gymro a bod eisiau dod yn ôl yma.

“Ond yn amlwg, fe aeth ei swydd a’i yrfa ag ef i Lundain, ond roedd bob amser wedi teimlo’n rhan o Gymru.”

Image

'Nerfus'

Fel rhan o’r broses o greu’r cerflun, dywedodd ei fod wedi cwrdd â merch Terry Jones ac wedi mynd drwy ei archif bersonol i chwilio am nodiadau ysgrifenedig a lluniau.

Dywedodd serch hynny ei fod yn pryderu am ymateb ffans Monty Python i’r cerflun terfynol.

“Mae’n brofiad nerfus, oherwydd ei fod yn enwog yn rhyngwladol, ac mae ganddo lot o ffans,” meddai.

“A gall ffans fod yn beryglus iawn, iawn os nad ydyn nhw’n hoffi’r hyn rydych chi wedi’i wneud!”