Mae taith Wrecsam yng Nghynghrair Pencampwyr UEFA wedi dod i ben ar ôl iddyn nhw golli 4-1 yn erbyn Riga ar y Cae Ras.

Rhoddodd Lili Jones Wrecsam ar y blaen yn yr wythfed munud yn rownd derfynol y rownd ragbrofol gyntaf.

Cafodd Maria Francis-Jones gerdyn melyn am dacl wael yn y 44ain munud.

Aeth Wrecsam i’r egwyl ar y blaen, ond tarodd Riga yn ôl yn gryf yn yr ail hanner.

Peniodd Minami Oi gôl gyfartal i Riga yn y 50fed munud cyn i’r tîm o Latfia fynd ar y blaen bedwar munud yn ddiweddarach.

Ychwanegodd Riga ddwy gôl arall i sicrhau buddugoliaeth o 4-1 a lle yn ail rownd ragbrofol y gystadleuaeth.

Roedd 1,192 o gefnogwyr yn bresennol ar y Cae Ras.

Roedd Wrecsam wedi curo Pyunik 4-2 ddydd Mercher yn eu gêm Ewropeaidd gyntaf erioed.

Bydd Wrecsam bellach yn troi eu sylw at amddiffyn eu teitl yn Adran Premier Genero.