Roedd bachgen 12 oed o ogledd Cymru “oedd wedi diflasu” yn gyfrifol am gyfres o droseddau gan gynnwys dwyn, bwrgleriaeth a fandaliaeth.

Fe wnaeth y bachgen gyfaddef i 11 o droseddau yn Llys Ieuenctid Llandudno rhwng mis Medi a Hydref, gan gynnwys dwyn o siop Clares ar Stryd Mostyn, Llandudno.

Roedd y troseddau wedi digwydd yn ardal Llandudno a Bae Colwyn.

Dywedodd yr erlynydd, Julia Galston, yn llys ieuenctid Llandudno ddydd Iau fod nifer o ladradau wedi digwydd yn groes i amodau mechnïaeth i beidio â mynd i mewn i siopau oni bai ei fod gydag oedolyn.

Roedd y bachgen hefyd wedi anwybyddu cyrffyw, gan gael ei ddarganfod yn oriau mân y bore yng Nghaer.

Dywedodd y cyfreithiwr amddiffyn, Carla Forfar, fod y bachgen wedi honni ei fod wedi troi at droseddu oherwydd ei fod “wedi diflasu”.

Dywedodd yr ynad, Ann Dickinson, wrtho: “Mae wedi mynd o’ch plaid eich bod yn gwrtais ac yn barchus i’r oedolion sydd wedi dechrau gweithio gyda chi.

“Gan fod hynny newydd ddechrau, ein penderfyniad yw ymestyn y gorchymyn atgyfeirio presennol am chwe mis, i gyfanswm o 12 mis.”

Ni ddyfarnwyd unrhyw gostau na iawndal ar sail modd.

“Rydych wedi cael eich rhybuddio,” meddai cadeirydd y llys. “Rydych chi’n gwybod beth fydd yn digwydd os byddwch chi’n dal i ddod yn ôl i’r llys.”

Roedd y gorchymyn atgyfeirio blaenorol am ladradau ac ymosodiad.

Llun: Llys ieuenctid Llandudno.